مأساتي في ( قصة وفاة حب حياتي )

عايزة أصرخ وأعلي صوتي وأقول أرحمنا يارب برحمتك
مش عايزة تاني طول سكوتي يبعدني يارب عن دعوتك
عايزة أصرخ على دنيا راحت في غمضة عين مع صوت صراخ من خبطة جامدة طير حياتي شحطط أبويا بهدل إخواتي
وبكل بجاحة قاعد وساكت بياكل لبانته يلعب في ياقته ورجله على رجلة التانية حاطت
ماقامش وقف عزا في حياة إنسانة خبطها أدى لوفاتها
ماقامش إعتذر من زوجها حتى وشايف دموعه على خده نازلة
قلبه محنش على طفل يبكي قلبه محسش بقلب يشكي ربنا من ظلمك ليه
أصلك يا إبني شاب متهور بيسوق بسرعة يلعب بلعبه غالية جابتها الحاجة مامته
وأرواح الناس في عينه سهله نخبط ونجري إيه يعني ما انتو كتير شوية وقولت في نفسي أقتل شوية أقلل منكم
أصله محسش في يوم بحرقة قلبه على موت حد يحبه
أصله محسش في يوم بحرقة قلبه على فقدانه مامته
بندم على ثانية في حياتي ضاعت وهي زعلانة فيها
بندم على كل ثانية ضاعت مش راضيه عني فيها
وأقول ياربي لو رجعتها ولا ثانية تاني هتزعل فيها
في قلبي هشيلها في عيني هاحطها ولا هبعد ثانية عن حضنها وهاعمل اللي يسعدها ويرضيها
الله يرحمك يا أمي في عيد الأم الكل بيحتفل بأمه ومحدش بيراعي شعور من فقد أمه
إدعولها بالرحمة وإقرأوا لها الفاتحة تنير قبرها أصل الله يرحمها كانت بتخاف من الضلمة 

كتبت يوم الثلاثاء الموافق 4/3/1214 في تمام الساعة 11 صباحا